الْحَمْدُ للهِ فَاطِرِ السَّمَوَاتِ وَالأَرْضِ، عَالِمِ الْغَيْبِ وَالأَسْرَار، شَدِيدِ الْعِقَابِ القَّوِيِّ الْجَبَّارِ.
وَأَشْهَدُ أَنْ لا إِلَهَ إِلَّا اللهُ وحده لا شريك له، الْوَاحِدُ الْقَهَّارُ
وَأَشْهَدُ أَنَّ مُحَمَّداً عَبْدُهُ وَرَسُولُهُ، بَعَثَهُ اللهُ رَحَمْةً لِلْعِبَادِ، لِيُبِينَ لَهُمُ الْحَلالَ وَالْحَرَامَ، وَلِيُحِلَّ لَهُمُ الطَّيِّبَاتِ وَيُحِرَّمَ عَلَيْهِمُ الْخَبَائِثَ، صَلَّى اللهُ عَلَيْهِ وَعَلَى آلِهِ وَصَحْبِهِ وَسَلَّمَ تَسْلِيمَاً كَثِيرَاً، أَمَّا بَعْدُ:
ФIыщIэ Алыхьым худощI, уафэри щIылъэри къэзыгъэщIам, щэхуми нахуэми щыгъуазэм, зи гущIэгъур иным, зи гьэзабри гуащIэм.
Щыхьэт дытохъуэ Алыхьышхуэм и закъуэныгъэм. Щыхьэт дытохъуэ Мухьэммэд лъапIэми صلى الله عليه وسلم и бегъымбарыгъэм.
Муслъымэн жэмыхьэт! Алыхьу дыкъэзыгъэщIам дыщывгъэшыни, дыкъызэрелыну къыдита диным дытезышыну, дыбгъэдэзышыну сыт щыIэми абы дыщышынэу, абы дигъэгузавэу дывгъэпсэу.
Диным утезышыфынури е щIэныгъэ мащIэращ е шыIэныгъэ мащIэращ. Аращ мыхъумыщIэу щыIэр къызыхэкIыжри.
Зи щIэныгъэ мащIэм бидгьэ гуэрхэр къыIэщIощIэ, япэ къэс жьакIуэми яужь йоувэри мэгъуащэ, Жэнэт гъуэгум сытетщ, жиIэурэ, Жэхьэнэмэр къелэжь.
Зи шыIэныгъэм мащIэри дуней хьэхум дехьэх, ихъуреягъым илъагъум зыIэпашэ, ахэр пашэ хуохъури и кIэухыр Iей мэхъу.
Мис апхуэдэу узыIэпишэрэ узэблишу, уи нэм узэрыхуимытыжам щхьэкIэ уи гуми ухуимытыжу укъэзыгъанэ фитнэхэм ящыщщ: цIыхубзхэр.
«ЦIыхухъухэм нэхъыбэ дыдэу зэран яхуэхъуу сэ си яужь къизна фитнэр: цIыхубзхэращ!», — жеIэ Бегъымбар лъапIэм عليه الصلاة والسلام-ым. (Бухъарий, Муслим).
Мыри къыджеIэ ЛыкIуэ лъапIэу ди ущиякIуэм عليه الصلاة والسلام: «Мы дунейр IэфIщ икIи гурыхьщ. Алыхь Талэми абы фытетыну фыкъытригъэхьащ: влэжьым еплъыну. Аращи, мы дунейм фыщышынэ, цIыхухбзхэми фащышынэ, ИсраIил и бынхэр япэ дыдэу зытеунэхъуар цIыхубзхэращ». (Муслим).
ЦIыхубзыр езыр Iейуэ аракъым абыхэм къарыкIыр, атIэ дэ езыр дыIеймэ, шыIэныгъэри тхуримыкъумэ, ди нэми дыхуимытыжмэ, дэркIэ ахэр Iей хъууэ аращ.
ЦIыхухъур цIыхубзым хуэныкъуэу, цIыхубзри цIыхухъум хуэныкъуэу езы Алыхьышхуэм къыщигъэщIакIэ, а хуэныкъуэныгъэр къабзэу зэрызэфIэкIын Iэмал къуитынущ. Мис а Iэмалым уфIэIэбыкIмэщ Iуэхум бэлыхь къыщикIыр.
ШейтIаныр апхуэдизкIэ бзаджэщ, цIыхури апхуэдизкIэ къэгъэпцIэгъуафIэщи, хьэлэлу Алыхьым къырита къабзэм нэхърэ, хьэрэмыр нэхъыфIу икIи нэхъ IэфIу къыщегъэхъу.
Мис апхуэдэ гъэпцIэгъуэ димыхуэн папщIэ, ди дин лъапIэм Iэмал зэриIэкIэ цIыхухъухэмрэ цIыхубзхэмрэ нэхъ зэпэжыжьэу, нэхъ зэпэIэщIэу щигъэтыну хэтщ.
Уеблэмэ, мэжджытым нэмэз щызэдащIым дежи цIыхухъумрэ цIыхубзымрэ нэхъ зэпэжыжьэху нэхъыфIу ебж. «ЦIыхухъухэм я сатырым я нэхъыфIыр ипэ ит сатырыращ, я нэхъ Iейр иужь ит сатырыращ. ЦIыхубзхэм я сатырым нэхъыфIыр иужь итращ, я нэхъ Iейр ипэ итращ», — жеIэ عليه الصلاة والسلام-ым. (Муслим).
Мы Iуэхум и бжэр нэхъ быдэжу зэхуищIын папщIэ унафэ къытхуещI ди Бегъымбарым صلى الله عليه وسلم: «ЦIыхухъумрэ цIыхубзымрэ я закъуэ зырамыщIыж, шейтIаныр ещанэу гъусэ къахуохъу абыхэм апхуэдэм деж». (Ахьмэд, нэгъуэщIхэми).
Зи диныр нэхъ къызыфIэIуэху муслъымэнхэр мы унафэм нэхъыбэу щебакъуэр Iыхьлы благъэхэм теухуауэщ. Щыкъу щIалэ, щыкъу хъыджэбз, пщыкъуэ, пщыпхъу, жаIэурэ Iуэхур ягъэлалэурэ, бэлыхь зи унагъуэм къихъуэхэр щыIэщ.
Гьумэр ибн Гьэбдил-Гьэзиз къыбгъэдэкIауэ, тхыдэм къыхэнэжа ущиехэм ящыщщ: «Уи Iыхьлы дыдэу щымыт цIыхубзым уи закъуэ укъыбгъэдэмынэ, уеблэмэ, КъурIэн еджэкIэ ебгъэсэн мурад уиIэ хуэдэу зыкъыпщыхъужми!».
Сэгьид ибн Iэл-Мусэйиби жеIэ: «ШейтIаным зыри Iэмал щимыIэжым деж, цIыхубзхэри къегъэсэбэпри зыхуейр къохъулIэ!».
Езы Алыхь Талэми ауэ сытми жиIакъым: «ولا تقربوا الزنا» — «Зинэм пэгъунэгъу зыхуэвмыщI», — жиIэу. «ФымыщIэ», жиIэкъым, атIэ пэгъунэгъу зыхувмыщI, жи.
Пэгъунэгъу узэрыхуэмыхъунури: уи нэм ухуэсакъыжурэ, цIыхубз зэхуэсыпIэ зекIуапIэхэм уакъыпекIуэкIыурэ, уи хамэм и закъуэ укъыбгъэдэмынэурэщ.
Мы дунейм ар зыгуэрым ебгъэщхьынумэ, ебгъэщхь хъунущ токышхуэ зыхэт кIапсэм. Апхуэдэ кIапсэм уеIусэныр зэрышынагъуэм хуэдэ дыдэу, гъунэгъуу убгъэдыхьэнри шынагъуэщ, узэщIишэу уиукIынкIэ хъунущи.
Алыхьым ди щхьэри, ди псэри, ди гури къытхуихъумэ, сыт хуэдэ фитнэми дащихъумэ. ЖытIам и сэбэп Алыхьым къыдигъэкI, сыт хуэдэ мыхъумыщIэми ди гур щигъэкI!