إن الحمد لله نحمده ونستعينه ونستغفره، ونعوذ بالله تعالى من شرور أنفسنا وسيئات أعمالنا، من يهده الله فلا مضل له، ومن يُضْلِل فلا هادي له. وأشهد أن لا إله إلا الله وحده لا شريك له، جَلَّ عن الشبيه والمثيل والنظير، وأشهد أن مُحَمَّداً عبده ورسوله، وصفه وخليله، وخِيرَتُه من خلقه، وأمينه على وحيه، أرسله ربُّه رحمة للعالمين، وحجة على العباد أجمعين، فصلوات الله وسلامه عليه وعلى آله الطيبين، وأصحابه الغُرِّ الميامين، ما اتَّصَلَتْ عَيْنٌ بنظَر، ووعَت أذن بخبَر، وسلَّم تسليماً كثيراً. أما بعد:
ФIыщIэри щытхъури нэгъэсауэ зыхуэфащэр Аллаху Тэгьаларащи, ахэр Абы худогъэфащэ. Ди псэм къыхэкI Iейми, ди IуэхущIафэм къыпкъырыкIыж мыхъумыщIэми дащихъумэжыну Алыхьым долъэIу.
Зыми хуэмыдэу, зыми емыщхь Алыхь Иным и закъуэныгъэм щыхьэт дытохъуэ; цIыхум яхигъэлъэпIыкIыу къигъэкIуа Мухьэммэд лъапIэми и бегъымбарыгъэм щыхьэту дытоувэ. Езыми, и гъусахэми, абыхэм едэIуэжахэми Алыхьым и нэфIыр къащыхуэну, и хъуэхъури къалъигъэсыну дахуолъаIуэ!
Муслъымэн жэмыхьэт! ЗэрылIэжынум шэч къытезымыхьэм, фIэкIыпIэ имыIэу кхъэр екIуэлIэжыпIэ зэрыхуэхъунури хьэкъыу зи фIэщ хъум, Алыхь Инми и пащхьэм зэрихьэжынум егупсысым — и дуней тетыкIэр абыхэм хуэфэщэжу егъэпс!
А гъэпсыныгъэм щыщщ: муслъымэнхэм хущытыкIэ дахэ яхуиIэныр, и бзэри и гури абыхэм яхуэкъэбзэныр, Iей игу къахуэмыкIыныр, гурыщхъуэ яхуимыщIыныр.
Аллаху Тэгьалам зыкъытхуегъазэ псоми къыджеIэ:
“يَا أَيُّهَا الَّذِينَ آَمَنُوا اجْتَنِبُوا كَثِيرًا مِنَ الظَّنِّ إِنَّ بَعْضَ الظَّنِّ إِثْمٌ وَلَا تَجَسَّسُوا“.
«Уэ Iиман къэзыхьахэ! Гурыщхъуэ щIыным зыщывдзей. Гурыщхъуэм гуэныхь къыщыхэкI щыIэщ. ТIасхъэщIэхыуи фызэхущымыт. Зым зыр щIыбагъкIэ фымыуб». (Iэл-Хьуджурат, I2).
Гурыщхъуэм гуэныхь къыщыхэкI щыщыIэкIэ, ар къызыхэкIынур сыт хуэдэ гурыщхъуэрами щомыщIэкIэ, къэнэжыр, гуэныхьым ущышынэмэ, гурыщхъуэ лъэпкъ умыщIынращ. Аращ дыкъызыхуриджэри ди Тхьэшхуэм.
Ауэ зыгуэркIэ цIыхум, и щхьэ хуимытыжу, и къуэш муслъымэным гурыщхъуэ гуэр хуищIамэ, адэкIэ Iуэхур куу ищIу зыгуэрхэр къитIэщIыну, щэху гуэрхэр къыщIигъэщыну яужь ихьэнкIэ зэрыхъунум папщIэ, къокIуэ Алыхь унафэр: «ТIасхъэщIэхыуи фызэхущымыт»— жеIэри.
ЗыгуэркIэ абыи фIэIэбыкIыжрэ, гурыщхъуэм ирихужьэу щэхур къыщIигъэщыну дэувэжрэ, зэригугъам хуэдэу зыгуэрхэр къыщIэщыпами, Алыхьым абы къыжреIэ: «Зым зыр щIыбагъкIэ фымыуб (фызыхуэпсалъэу фыдэмыувэж)», атIэ, Iэмал иIэмэ щIэхъумэ, уи къуэш муслъымэнми и щэхур наIуэ къомыщI, и напэри томых, хэт ищIэрэ, уэри апхуэдэ утыку гуэр уихуэжынкIэ хъунущ. Нобэ зыпIыгъыжмэ, пщэдей а утыкум Алыхьым укъырихынщ.
Ди жагъуэ зэрыхъунщи, мы аят лъапIэм дыкъызыхуриджэм куэдыр дыпэжыжьэщ. Муслъымэным зыгуэр къыщыщIамэ дыгузэвэным, дэ езым къытщыщIа хуэдэу дыукIытэжыным ипIэкIэ, «дэ сыту фIыуэ къытщымыщIарэ, абы сыту фIыуэ къыщыщIа» жытIэ хуэдэу ди бзэр утIыпщауэ дыдэтщ.
Ауэ ипэжыпIэкIэ къапщтэмэ, абы къыщыщIари дэ къытщыщIа хуэдэщ, сыт щхьэкIэ жыпIэмэ, муслъымэнхэр псори зыщ, я напэр зы напэщ, я щIыхьыр зы щIыхьщ. Зым деж ныкъусаныгъэ щыIэу, уэ ныкъусаныгъэншэ ухъунукъым, зым деж фIей гуэр щыIэу, уэри къабзэ ухъунукъым.
ЦIыху губзыгъэми и щхьэр и Iуэхущ, и дагъуэхэм йолэжьыж. ИкIи ипэжыпIэкIэ къапщтэмэ, цIыхум езым ныкъусаныгъэу хэлъым елэжьыжыну яужь ихьэмэ, и гъащIэ псор хурикъунукъым абы. НтIэ, и щхьэр къигъэнауэ, зи яужь итыр сыт цIыхур?!
ЦIыхум Iей хужыпIэныр зэрыхьэрэмым хуэдэу, Iей уигу къыхуэкIынри хьэрэмщ. Уи нэкIэ щомылъэгъуакIэ, уи тхьэкIумэкIэ щызэхомыхакIэ е цIыху пэж гуэрым илъэгъуауэ е зэхихауэ къыщыплъэмыIэсыжакIэ, «абы и гум мыхэр илъщ!» жыпIэу зыгуэрхэр зэбгъэзахуэ хъунукъым, сыт щхьэкIэ жыпIэмэ, гум илъыр зыщIэр Алыхьращ. Алыхьыр дэуэгъу къыпхуэхъуну ухуэмеймэ, къэгъанэ апхуэдэ Iуэху бгъэдыхьэкIэр.
Зэгуэрым Бегъымбар лъапIэм صلى الله عليه وسلم-эм, Кэгьбэм еплъри, жиIащ: «Уэ уи пщIэр икъукIэ инщ, ауэ муслъымэным и пщIэр ууейм нэхърэ Алыхьым и деж щынэхъ иныжщ. Уэ птеухуауэ Алыхьым хьэрэм ищIар зыщ, ауэ муслъымэным теухуауэ Алыхьым хьэрэм ищIар щы мэхъу: и лъыр, и мылъкур, Iей уигу къыхуэкIыныр!». (Бейхэкъий).
Дызэкъуэтыным, дызэрыIыгъыным, дызэрылъагъуным, дызэрылъытэным икъукIэ мыхьэнэшхуэ яриту щытащ ди Бегъымбар лъапIэм صلى الله عليه وسلم. Мыдрейуэ муслъымэнхэр зэкъуэзыудыну сыт щыIэми абы дыщигъэщтащ, мы Iуэхугъуэри абы щыщщ.
Дызэвгъэлэжьыж дэтхэнэ зыри! Дэ езым ди щхьэкIэ ди гуэныхьхэр зэрыдгъэкъэбзэжыныр, ди ныкъусаныгъэхэр зэрызэдгъэзэхуэжыныр, ди дагъуэхэр лъэныкъуэ зэредгъэзыныр нэхъ къытфIэIуэхуу дывгъэпсэу! Алыхьым ар псынщIэ тщищI, и арэзыныгъэри къыдигъэлэжь!