الحمد لله القوي العزيز، الحميد المجيد؛ هدى المؤمنين لتوحيده، ووفقهم لطاعته، وجمع كلمتهم على دينه، فبشريعته يجتمعون، وبتركها أو تفريقها يفترقون، نحمده على ما هدى وكفى، ونشكره على ما أعطى وأسدى.
وأشهد أن لا إله إلا الله وحده لا شريك له. وأشهد أن محمدًا عبده ورسوله؛ صلى الله وسلم وبارك عليه وعلى آله وأصحابه وأتباعه إلى يوم الدين.أما بعد:
Зи къаруми, зи лъэщагъми гъунапкъэ имыIэ, щытхъури пщIэри нэгъэсауэ зыхуэфащэ Алыхь Иным фIыщIэ худощI. Алыхьым и нэфIри къыщыхуэну, и хъуэхъури къылъигъэсыну дыхуолъаIуэ лIыкIуэм я нэхъ лъапIэм.
Шэч зыхэмылъращи, хьэрэмыр хуэлэжьын пэтрэ зымылэжьращ Алыхьым щышынэр; псэемыблэжу псапэ зылэжьращ Алыхьым и гущ1эгъум щыгугъыфынур.
ЗыкъызыфIэщIыжыр и щхьэм къыхуэнэжынущ, ищIэмкIэ Алыхьым хуэупсэу зи гугъэжыр гъуэщэнущ.
Муслъымэн жэмыхьэт! Алыхьым и гъээзэкъуэныгъэр муслъымэнхэм яхипща нэужь, ди Бегъымбар лъапIэр нэхъыбэ дыдэу зэгугъахэм ящыщщ: муслъымэнхэр зэкъуигъэувэным, зэришэлIэным, зэкъуэшу зэбгъэдэту ищIыным.
IуэхуфI къепхьэжьэным куэд пыщIащ, ауэ а къепхьэжьар зыIэщIомыгъэхужу зы щIыпIэ нэбгъэсыным пыщIар нэхъыбэжщ. Ар фIыуэ къызыгурыIуэу щыта лIыкIуэ лъапIэм صلى الله عليه وسلم зэкъуэшыныгъэр сыт и лъэныкъуэкIи къихъумэу щытащ.
Зы махуэ гуэрым щIалэщIитIым я зэхуаку псалъэмакъ гуэр къыдэхъуати, зым мухьаджирхэм я дежкIэ зигъазэри: «Уэ, мухьаджирхэ, фыкъыздэIэпыкъу!», — жиIэри гуоуащ, адрейм анщархэм я дежкIэ зигъазэри: «Уэ, анщархэ, фыкъыздэIэпыкъу!», — жиIэри гуоуащ.
Абы зыгуэр къикIынкIэ зэрыхъунур фIыуэ къыгурыIуэщ صلى الله عليه وسلم-ми и къежьапIэ дыдэм деж кIэщIу щыпиупщIащ, мафIэр бзийр лыгъэ мыхъу щIыкIэ игъэупщIыIуащ.
ЯжриIащ абыхэм عليه الصلاة والسلام-ым: «Фи щIыбагъым сыкъыдэту джахилийе зэпсэлъэкIэр къевгъэкIуэкIыу ара? Къэвгъанэ ар, мэ Iей къыкIэрех абы!». (Бухъарий).
Муслъымэн жэмыхьэт! Псалъэмакъым, зэныкъуэкъуныгъэм, зэтемыхуэныгъэм мыхъумыщIэу къыздахьым хуэдэу къыздэзыхь зыри щыIэу къыщIэкIынкъым.
УщызэрыIыгъым и деж уи хьэкъ гуэр пфIэкIуэдми, ущэзырымыIыгъыжым и деж уи хьэкъыу хъуар пфIэкIуэдынкIэ шынагъуэщ. Уи щхьи ухуимытыжу, уи унагъуэми ухуимытыжу, уи мылъкуми, уи щIыхьми уахуимытыжу утыкум укъинэнкIэ хъунущ.
ЦIыхухэр утыкум къилъэда иужькIэ, я акъылыр яфIокIуэд, я нэхъ делэм бжьыпэр еубыдри, зэрыгупу абы ирешажьэ. Мо къомым щащIэкIэ, хъуну къыщIэкIынщ, жеIэри а нэхъ губзыгъэри абы здыхелъафэ.
Аращ Бегъымбар лъапIэм صلى الله عليه وسلم Дэджджалым и хъыбар зэхэтхмэ, абы дызэрыхуэмэзэным, пэжыжьэ нэхъ дызэрыхуэхъуным дыкъыщIыхуриджэр, сыт щхьэкIэ жыпIэмэ, абы упэщIэхуэмэ, уи гупсысэкIэм бетэмалу зихъуэжынкIэ хъунущ.
Ди Iуэхур ефIэкIуэну, зы щIыпIи нэдгъэсыну дыхуеймэ, нэхъыжьым пщIэ хуэтщIыфу, щIэныгъэ зыбгъэдэлъым дедэIуэфу, чэнджэщкIэ ди Iуэхухэр зэфIэтхыфыу зедгъэсэн хуейщ, армырауэ хьэнэф хьэнэф и пщыжу дызэхэтмэ, щыхупIэм псори дыхуэкIуэнущ, кхъухьыр зезыгъакIуэхэр куэд щыхъуам и деж ар щIелъафэри йожьэж.
ПщIын нэхърэ щIа хьэзырыр пкъутэныр нэхъ тыншщ. Гъэсэныгъэм утемылажьэу, къомыдаIуэр бгъэсыну яужь уихьэнри нэхъ Iуэху псынщIэщ, ауэ мыр тыншщ, мор псынщIэщ, жыпIэу зэфIэпх хъун Iуэхугъуэхэм мыр ящыщкъым.
Аращ зы щIэныгъэлIи щIыжиIэр: «Алыхьым и гъуэгум утету упсэуныр нэхъ гугъущ, Алыхьым и гъуэгум утету улIэжыным нэхърэ!».
Нэхъ гугъущ, сыт щхьэкIэ жыпIэмэ, улIэжыным сабырагъыу хуейр дакъикъэ бжыгъэмэ, Алыхьым и гъуэгум утету упсэун папщIэ уи гъащIэ псом сабырагъыр пхэлъын хуейщ.
Ди хъейр зыхэлъым ди Iэр Алыхьым тыригъахуэ, мамырыгъэр ди щIыналъэм щытепщэу дигъэпсэу, муслъымэнагъри лъэ быдэкIэ мыбы щыувауэ Алыхьым дигъэлъагъу!